"Ateistin ibadəti" 3 kiçikölçülü və ibrətamiz hekayədən ibarətdir. Hər bir hekayənin bir-birindən fərqli məzmun və ideyası var.
Əsərlə eyniadlı birinci hekayə şagirdin öz müəllimini kilsəyə gedərkən görməsi ilə başlayır. Təəccüb doğuran məqam isə müəllimin ateist (inancsız) olmasıdır. Daha sonra müəllim şagirdinə bunun səbəbini açıqlayır. Hekayədə çatdırılmaq istəyən fikir budur ki, bəzi insanlar kənardan özlərini "dindar" göstərməyə çalışırlar. Əslində isə həqiqətdə o deyillər. Onun dediyi sözlər "Mən əksər ibadət edənlər kimiyəm: zahirən əsl mömin, batində isə sizin kimi, özüm kimi Allahsız" bunu təsdiqləyir.
Digər bir hekayə isə "Nar bağı". Bu hekayədə övladlarını hədsiz məhəbbətlə sevən, onları təkbaşına böyüdən bir anadan bəhs edilir. Ana öz övladlarının tərbiyəsi ilə yaxından məşğul olur, onları cəmiyyətə faydalı bir şəxsiyyət kimi böyüdür. Daha sonra isə xəstəliyə tutulur və dünyasını dəyişir. Övladları artıq böyüyür, ali təhsilli insanlar olur. Və Nar bağında yerləşən evlərindən köçüb gedirlər.
"Əmanət" hekayəsində isə həmin dövrlərdəki romantik, sevgi münasibətlərindən bəhs olunur.
Əlbəttə, bu hekayələrin hər birində fərqli insan taleylərindən, hadisələrdən danışılır və insanda bir çox yeni fikirlər formalaşdırır. Amma mən bir süjet xəttinə malik olan əsərləri daha çox üstün tuturam. Yenə də, bunlara baxmayaraq, oxumağa dəyər bir kitabdır deyə düşünürəm.
