Bir müddət öncə inanırdım ki, kitablar, necə olur olsun, növündən və kitab oxuyanın kimliyindən aslı olmayaraq insanlar üzərində böyük təsir gücünə malikdir, insan fikrinin, düşüncəsinin və həyata baxışının formalaşmasında təbii ki, kitablar böyük rol oynayır. Ancaq son zamanlar bunu da anlamış oldum ki, insan əgər oxuduqlarının özünə təsir etməsinə və düşüncə tərzini dəyişməsinə icazə vermirsə, hər nə qədər mütaliə edirsə etsin, oxuduqlarından özü üçün bir pay çıxmayacaq. Və bu səbəbdən də belə bir şey yazmaq qərarına gəldim ki, siz də əgər öncələr mən düşündüyüm kimi düşünür və insanları, kitab oxuyub oxumamağına görə sorğulayırsızsa, etməyin. Çünki insanlar kitab oxumadan da fikirlərini və düşüncələrini formalaşdıra, inkişaf etdirə bilər. Əgər oxuyaraq yerimizdə sayırıqsa, düşüncə və ya həyata baxış bucaqları yenə eyni şəkildə qalırsa, müəyyən yaxşı mənada dəyişikliklər hiss olunmursa, oxumağın bir mənası qalmır məncə. Əsas olan, oxuyarkən bizə öncədən məlum olan cümlələrin altından xətt çəkmək deyil, bizə yeni olan fikirlərdən özümüzçün bir yenilik qazanmaqdır.