Daha sığınacaqlara, sakit limanlara yox, fırtınalı coşqun dənizlərə yelkən açmaq istəyirəm. Adam bir stəkan suda belə boğula bilər. Geniş dənizlərdə boğulmağın şanı-şöhrəti var heç olmasa, “doya-doya boğuldum” deyərsən.
Mənə bir qaçış hekayəsi danış. Elə bir hekayə ki, kədərli olmasın, orada heç kim ölməsin, heç kim ağlamasın. Madam nağılbazsan, onda gözəl bir nağıl danış. O nağılda sevənlər bir-birinə qovuşsun, küsülü qardaşlar barışsın. Nağılçı mənə bir qaçış hekayəsi danış, elə bir hekayə ki, orada qaçanlar mənzil başına sağ-salamat çatsınlar, uşaqlar ölməsin, sevənlər ayrılmasın, kimsə ac qalmasın. Axırında ümid olsun, barışıq olsun. Gözəl bir nağıl danış, axırı yaxşı qurtarsın.